Марстонь паваз icon

Марстонь паваз



НазваниеМарстонь паваз
Дата конвертации28.08.2012
Размер96.83 Kb.
ТипДокументы

Марстонь паваз.

1

Мольсь мартть кемонце шиц. Ушесь ульсь лямбе, но ловсь нинге аф марнек солась. Настя тячи стясь рана. Сон варжакстсь вальмава, штоба ваномс, пара ли ушесь, ляци или аф шись. Сон крхкаста таргазе ваймонц и тага лятфтазе ся сексень илятть, мзярда прважазе Вадимонц армияв:

- Тон кармат учемон, Настя?- тага кизефтезе Вадим.

- Мон най карман учемот! – отвечась стирсь.

Сонь ни ашель виец кирдемс сельмоведензон. Вадим кемоста люпштазе Настянь мяштезонза и палазе сонь. А шобдава церать сявозь армияв.

Васенце ковть Настя фалу аварькшнесь и пяк лажаткшнесь кельгомнянцты, но меле тонаткшнесь.

Настянди ульсь кевейхксые киза, а Вадимонди комсь кафта. Настя тонафнесь омбоце курсса, но курок тонафнемац савсь кадомс, сяс мес пяк сярятькстсь тядяц, конань мельге эрявсь ваномс шинек-венек, да и ярмаксна пцтай ашель, штоба тонафнемс сяда тов.

Анна Михайловна касфтсь стирнянц эса ськамонза. Мзярда Настянди топодсь вете кизонят, аляц кадозень синь и тусь лия семьяв. Но тядяц фалу корхнесь стирнянцты, што аляц шавовсь.

2

Тячи ни ушедсь сисемце ковсь, кода Вадим служай. Настя козовок изь яксе ялганзон мархта: аф ульцяв, аф дискотекас клубу. А тячи мала ялганц Иринань шачема шиц. Ялгац тердезе Настянь пялонза лездомс аноклама, сяс мес илять пуромихть ялгасна. Ирина тожа кадозе тонафнеманц и тяни работай продавецокс.

Настя ярхцась, срхкась и лиссь кудста. Ки кувалма сон рамась вете якстерь розат, штоба каземс ялганцты.

3

- Ой, Настька, комозце кизонязе топодсь, а мон стаки ськамонан. Тонь вага Вадимце ули, мрдай армияста, рьвакс туят и кармат павазу, павазу! А мон мезе? Ёфси аф мазыян, киндинге аф эряван, - азозе Ирина и варжакстсь Настянь лангс.

Виде, Настя ульсь пяк мазы: сельмонза сенепт, шяяренза нюрьхкянят, равжет, шамац ульсь акша-акша, бта лов. И тя пяк мазопнезе сонь. Мзярда сась илядсь, сембось ульсь ни анок. Вов састь Иринань ялганза. Синь казендсть тейнза казнет, поздравляндакшнезь шачема шинц мархта. Мзярда сембе ушедсть озсема шрать ваксс, Настя саворня ворьгодсь ёткстост и тусь куду.

Иляденьберьф сон тага арьсекшнесь Вадимонь колга, но тяни сонь арьсеманза лиятольхть. Сон стане жа арьсесь Иринань валонзон колга. Настя содазе, што Иравок най кельгозе Вадимонь и тейнза арась ужяль Ира, сяс мес ялгац тяни аф павазу.

Омбоце шиня Настя тусь Андреевать пяли. Вадимонь тядяц пяк кенярдсь инжити:

-Вай, Настенька, шумбрат! Конашкава пара, што сувать пялонк! Кода тефне? Вадим тяшни сёрмат? – кенярдезь кизефтезе Лидия Ивановна.

- Шумбран, тевоне молихть, а Вов Вадим пцтай афи тяшни, улема пингтонза кржа.

- Ну, тя мезевок аш. Курок сай и сембось тага кармай лац, - ляпоняста мярьгсь тядясь.

Настя ащесь пялост аф ламос и тусь меки куду.

Тяфта ётась тага пяле киза.
Настя полафтсь, кармась тяни лисендема ялганзон ёткс. Ирина ялгац пцтай эрь шиня якась тейнза. Но весть Ира ёрась лихтемс Настянь клубу. Настя ашезь атказа. Илять синь срхкасть и тусть. Сон сась васенцеда клубу, кодак прважазе Вадимонь армияв. И тя васенце аськолкссь, конань Настя тиезе клубть зданиянцты, ульсь васенце аськолксокс предательствати, конань Настя сонць нинге ашезе шарьхкотькшне.

Сембе шарфнесть, ванондсть Настянь лангс, бта вестенге изь няенде сонь. И виде, сон ульсь пяк мазы, што аф приметамс сонь ульсь аш кода. Но тяда меле сембе тага ушедсть кштима. Настя изь сода, мезе тиендема тейнза. Ира кадозе сонь и тусь лиятнень ёткс. Тя пингть Настя марясь фталонза церань вайгяль:

- Шумбрат, мес тяфтама мазы стирсь ськамонза ащекшни? Монь Антон лемозе, а тонь кода? – кизефтезе цёрась.

Настя эвотьфста варжакстсь лангозонза. Сон изь сода месендема: шарфтомс и тумс или азомс лемонц и корхнемс сяда тов. Но меле цють маряви вайгяльса азозе: «Настя! Настя лемозе».

Синь корхнесть аф ламос, сяс мес клубть курок пякстазь. Настя шарфтсь, лиссь клубста, ушедсь сельмоса Иринань вешендема. Но ялгац косонга изь няев, а фталонза Настянь тага ащесь Антон.

- Можна ускте куду? – кизефтезе сон стирть.

- Куду? Ускомс? –дивандазь пшкядсь стирсь, -монцьке пачкодян, пасиба.

-Ну, эста мон машинафтома молян.

Кода Настя изь атказа, Антон сякокс прважазе сонь. Антон ульсь аф пяк мазы, серес кувака, комсь вете кизоцоль. Щаф ульсь козяста и машинацка цебярель. Няевсь, што сон ульсь козя семьяста. Вадимонь колга Настя мезевок изь корхта, бта сон и ашель эряфсонза.

Омбоце шиня Антононь семьяцка содазе Настянь колга. Стирсь пяк тусь Антононь мяльс. Сон пцтай эрь шиня сашендсь Настянь кудонц ваксс. А Настя сонцьке изь шарьхкоде, кода ушедсь юкснема Вадимонь, арьсесь аньцек Антононь колга, но нинге изь кельге сонь.

Тя сембось пяк кенярьфтезе Иринань. Сон арьсесь, што Вадим тяни кармай сонне.

Ётась пцтай тага киза. Вадимонь саманцты ляткшнесь фкя ков. Настя срхкась рьвакс. Вадимонь тядяц изь сода, кода азомс церанцты Настянь колга. А Настя ульсь пяк павазу. Сон пяк учезе свадьбань шинц, мзярда сонь кармай мирдец, сонцень семьяц.

Рьвакс тумдонза меле сон ётась мирденц кудозонза. Кудсь ащесь пцтай ошть кучкаса и ульсь мянь колма этажста. Ковда меле Антон тусь лия ошу командировкас, кучезе аляц. Настя лядсь эряма Антононь тядянц и алянц мархта.


****

Тячи Ирина сась рана шобдава Настянь пяли и азозе, штос сась армияста Вадим и семботь ни содасы. Настянь ашесть кирдев сельмоведенза. Сонь пяк мялецоль няемс Вадимонь. Настя тусь пялост.


****

Вадим кудса ськамонзоль. Мзярда сон няезе Настянь, пяк кенярдсь, нльне тусть сельмоведенза, но сон лятфтазе семботь, мезе тись Настя:

- Настя, тон месендеть, мезе тиеть?

Настя авардсь. Сон ашезе сода, мезе отвечамс.

- Архт, Настя, архт мирдценди, тонь тяни ули семьяце. Тук куроконе и юкстамак.

Настя тяни шарьхкодсь, што тянимс кельгозе аньцек Вадимонь и што Антон тейнза аф эряви. Но тиемс тяни ашель мезе.

Настя мольсь ульцява. Сонь шудесть сельмоведенза. Но вдруг сонь кундазе стирь:

-Тонь Настя лемце, -кизефтезе стирсь.

Настя отвечась:

-Да.

- Содасак мезе, Настя, аф эсь вастозт эцеть.

- А тон кият тяфтамсь, и мезе тейть эряви, -кизефтезе стирсь.

- Мон Антононь вете кизот ни кельгса. А тон семботь шарфтыть монь эряфсон. Мезенди тейть тя эряви? Тон вдь сонь аф кельгсак. Сон тонь каттанза, кода и Верань, - азозе стирсь и ёрась тумс.

- Ащек, ащек, тон мезень колга корхтат? Кодама Вера?

- Авац ульсь Антононь Вера. Синь аф марсот, но ули цёрасна, эряйхть лия ошса. И Антон тя пингть мархтост. Сон эрь ковня якай.

- Кие тейть тянь азозе? Васькафнят.

- Тят веронда, тя тонь тевце, а тейне аш мезенди васькафнемс, - азозе стирсь и тусь Настянь ваксста.

Настя сась куду, сон тага аварьгодсь. Азондозе семботь Антононь тядянцты и алянцты. Стирсь мярьгсь, што тя куду сон оду аф иляды. Настя кочказень вещанзон и тусь эсь квартиразонза.

Мзярда мрдась Антон и мольсь Настянди, стирсь мезевок изь ёра кулхцондомс и ашезь мрда меки. Сонь мяльсонза тяни ульсь аньцек фкя – кода мрдафтомс Вадимонь. Но курокста Ирина пачфтезе Настянди, што синь Вадимонь мархта рьвяяйхть. Настя ашезе сода, месендема тяни. И ёрась кадомс семботь стане, кода ули.

Малаткшнесь свадьбань шись. Ирина тяни пцтай изь сашенда ялганцты, изь корхне мархтонза. Свадьбати аноклась сонць. Вадимоньге Настя пцтай изь няенде.

И вов фкя шиня Вадим звонясь Настянь пяли:

- Настя, тейнек эряви васедемс!

-Мезенди, - кизефтезе стирсь.

-Монь Ванды свадьбазе. Ёран мархтот корхтамс кой-мезень колга.

Вадим азсь адрес, коса кармай учема.

Настя изезе сода, мезе эряви Вадимонди, но сембе сяка сась. Тя ульсь квартирась, коса Ира и Вадим кармайхть эряма свадьбада меле. Вадим ни тосоль.

- Ну, мезень колга ёрат корхтамс, - кизефтезе Настя.

- Месендеть тон, Настя, накой тяфта тиеть? Эрь тяни павазуват?

Настянь тусть сельмоведенза, сон мезевок изь отвеча.

Вадим каясь тейнза шама ланга, тоса тага весть, тага. Сонценьге тусть сельмоведенза. Настя прась. Вадим прась ваксозонза. Вадим прась ваксозонза, ёрась ужяльдемс, но тага лятфтазе семботь и тага каясь. Меле цёрась таргазе пистолетонц и ладязе Настянь пряс. Настя мезевок изь шарьхкоде. Сон пялес ёжефтомоль, но станяк шудесть сельмоведенза. Вадим арась плманжа лангс Настянь инголи:

- Катк минь тяса аф карматама марса, но «тоса» минь ульхтяма павазуфт!

Сон ляцезе Настянь, а меле и эсь прянцка. Синь кулость марса и улихть фалу марса.


^ Афкуксонь ялгат


Колянь ялгац Степа эрь кизоня, тялонь каникуласта, сашенды ошста вели ваймама. Тяса эряйхть атяц и бабац. Кафцьке церанятнень атясна охотникт. Колянь атянц ульсть кафта пиненза, конат пяк лац охотендайхть, Юнга и Волчок.

Тя тялоть Степа тага сась вели. Сяка жа шиня тусь ялганцты. Коля кельгозе, мзярда Степа азонкшнесь ошть колга. Тейнза ульсь тя интересна, сяс мес сонць ошса вестевок ашель. А Коля азонкшнесь ялганцты атянц охотендаманц колга, пеняцякшнесь, што атяц мархтонза аф сявондьсы, кле, пяк емланя, штоба сяшка пакш вири якамс, да нинге соксонза аш. Корхнемада меле церанятне фалу лисендсть пирьфи пинетнень мархта налхксема.

Тячи Колянь атяц мярьгсь цераняти:

- Тячи илять охотникне кочкавихть Митрей атянь пяли. Монга молян, сяс сави тейть ащемс кудса ськамот.

- Атяй, ськамон пелян. Сявомак мархтот.

- Аф сяфте. Аш мезьда пелемс, оцюват ни. Тоса мон мянь пяле вети карман. Кда пелезеват, листь пирьфи пинетненди.

- Атяй, а, пади, Степань пялонк тердьса?

- Воляце. Тердьк. Аньцек мзярс ашан, тяда коленде,- кардазе атяц и тусь.

Коля лиссь кудста и тусь Степати. Степа бабанц мархта кафонестольхть, атяц кудса ашель.

- Степа, аде тячи пялонк удома, ськамон аф пара,- мярьгсь церанясь ялганцты.

- Кати. А бабазень ськамонза кадса?

Анна баба озафоль вальмять ваксса, кодась. Марямок уноконц валонзон, шарфтсь церанятнень шири.

- Коза тага срхкаде?- кизефтезень бабанясь.

- Аннакай, нолдак Степань тячи пялонк удома. Атязе тусь, а ськамон пелян,-эняльдезевсь Коля.

-Ну, архт. Аньцек тяда коляндя.

- Аф, аф карматама.

Церанятне пара мяльса лиссть ушу. Малаткшнесь илядсь. Ушеса ков валдоль, менельсь таватфоль эрекста пиндолды тяштьса. Сетьме, аньцек ловсь моцорды пильгала.

Егор атя ушедсь срхкама. Церанятне ванондсть вальмава.

- Мон тунь. Прянтень вятиенть лац,- тумстонза мярьгсь атясь.

Аф лама пингта меле Степань мархта Коля лиссть пирьфи. Стенаса повфтафоль Егор атянь ружьяц.

- Няйсак, кодама атязень ружьяц,- валхтомбачк шнафтсь пря Коля.

- Моньге атязень тяфтама ули.

- Степка, монь прязон сась мяль.

- Кодама ина?- кизефтезе Степа.

- Аде охотас! Мезевок кундатама! Ванат, тяда меле атязевок шнасамань. Кармай мархтонза охотас сявондемон,- корхтась Коля.

- Кати, а кда сюцесамазь?- кизефтезе Степа.

- Аф сюцесамазь,- отвечась Коля.

-Ушеса ни шоподсь, сокстка аш.

- Эрь шоподсь, тя сяда пара. Охотникне вири велангска якайхть. Веть зверьхне аф пелихть, сяс лисендихть кяшема вастстост. А минь аф лама ляцтяма и сатама меки, пинетненге сявсайнек.

- Афи содаса. Атязе корхнесь, што вирьса улихть колма оцю врьгазонь стаят. Сивсамазь минь тозк.

- Тят пеле! Атязень ружьянц мархта кивок аф токасамазь,.- тага шнафтсь пря Коля.

Аф лама пингта меле Стёпа согласиндась. Цёратне лямбста срхкасть, сявозь ружьять, серьгядезь пинетнень и тусть вири. Волчокть мархта Юнгась арнесть тяза – тоза, эшелякшнесть ловса. Пинетнень мархта колендезь и налхксезь церанятне афи шарьхкодсть, кода пачкодсть вири.

- А тон маштат ляцема?- кизефтезе Стёпа.

- А мезе тяса маштомс? Курокть люпштайть, нумолсь аш.

- А патрон ули?- тага кизефтсь Стёпа.

- Тят шумна! Няйсак, тоса, тумоть ала, кати – мезе ули. Волчок, Юнга, сада сяй, на, на!

Волчоксь ласьксь Колянь ваксс ськамонза.

- Вона, Волчок, взять, сявк,- взафтозе Коля пинеть.

Волчоксь саворня нежедсь тумоти. Хоп! Кати – мезе кундась. Кандсь азорти нумол.

- Молодец, Волчок!- шназь пинеть цёранятне.

- Тяни тейть ляцьтяма и куду!- мярьгсь Коля.

- Коля, а коса Юнгась?- кизефтезе Стёпа.

- Кати,- эводсь цёранясь,- Юнга, Юнга, сак тяза, косат? Юнга, Юнга.

- Слеттка аф няевихть. Мон пелян. Пади, врьгасне сивозь?- азозе Стёпа.- Аде куду, а то ськамон туян.

- А, пади, Юнгась куду ворьгодсь? Эста аде,- корхтась Коля.

Аф. Юнгась кудса ашель. Коля пякстазе Волчокть и аварьгодсь:

- Мезе тяни атязти азан? Шавсамань,- авардсь Коля.

- Азсаськ видеть. Пади, мезевок аф тии. Аде маттама. Ванат, шобдава Юнгась кудса кармай.

Шобдава Егор атя андозень цёранятнень. Меле Стёпа тусь куду.

- Молян тяни пинетнень андсайне, – мярьгсь атясь.

- Атяй, тят яка. Мон азондса тейть семботь, мезе ульсь исяк.

Коля азондозе исяконнеть. Сонь тусть сельмоведенза. Атяц сюцезе пяк, шиньберьф ашезь корхта цёранять мархта.

Шобдава атясь стяфтозе уноконц:

- Стёпа ялгаце ванды ёрай тонь сявомс ошу, молят?- кизефтезе Егор атя Колянь.

- Молян, молян!- кенярдезь отвечась ся. – Атяй, а тон оду аф кирдят кяж лангозон?

- Тяни аф. Но оду тяфта тят тиенде. Кда Юнгась афоль юма исяк, то сяка мзярдонга тя лисель.

- А мес тяфта арьсят?- кизефтезе цёранясь.

- Сон врьгаз лефкс. Да,да, етась ни колмошка киза. Мон Волчокть мархта якань охотас. Сон музе варять, коса ульсть врьгаз лефкст. Ветешкаль эздост. Фкясь педезь – педсь тейнек. Вов и сявоськ мархтонк. И тонафтоськ пинекс эрямати. Арьсень, пади, юкстазе врьгазонь промозонц. А сон няк кода уленди. Аф стак корхнихть, мзярс врьгазть тяк анда, сон сяка вири ванны. Да, вирьса музень, пади, врьгаз ялганзон, да лядсь мархтост. Пара мархтонт мезевок изь лисе. Аде, тячи сяфте вири.

Цёранясь атянц мархта ярхцасть и тусть, Волчокть сявозь мархтост.

Вирьса сетьмоль. Ловсь цятордсь пильгалост. Вирьса ульсь пара.

- А тяни арак фкя вастс и учт, мзярс мезевок аф няят,- указовась атясь.

Цёранясь марясь фталонза кодама - бди шум и шарфтозе прянц:

- Атяй, атяй, ватт тяза!

- Мезе лиссь ина?

Фталост ащесь врьгазонь стая. Тоса ульсь кеветиешка врьгаз. Инголест ащесь Юнгась.

- Ащек фкя вастса, тят шерьхке, а то врьгасне врьгятихть лангозонк,- мярьгсь атясь.

Волчокське, няемок Юнгать, ерась нежедемс тейнза, но эводсь врьгаснень эзда и ащесь апак шерьхк.

- Атяй, тя Юнгась. Сон тяни меки мрдай?

- Аф, цёрай. Тяни сон эсь кудсонза. Няйсак, конашка семьяц. Музень сонценнетнень.

Юнгась ванць аф ламос ингольдень азоронц лангс, а меле врьгаснень мархта тусь вирть потму.

- Ну мезе, цёрай. Няеськ сянь, мезе ёраме. Тяни аде куду.

Волчоксь, Коля и Егор атя саворня тусть куд шири.




Разместите кнопку на своём сайте:
Документы


База данных защищена авторским правом ©podelise.ru 2000-2014
При копировании материала обязательно указание активной ссылки открытой для индексации.
обратиться к администрации
Документы

Разработка сайта — Веб студия Адаманов